Музей

Школьны  літаратурны  музей А. С. Пушкіна

        Школьны літаратурны музей  А.С.Пушкіна  адкрыты 29 студзеня 1983 года.  

      Стваральнікам і кіраўніком  стала  Марыя  Пятроўна  Жыгалава, настаўнік-метадыст  рускай  мовы  і  літаратуры,  заслужаны  настаўнік Беларусі,  а  цяпер  доктар  педагагічных  навук,  прафесар  кафедры  беларускай  і  рускай  моў  Брэсцкага  дзяржаўнага тэхнічнага універсітэта,  акадэмік  Акадэміі  педагагічных і сацыяльных  навук Расійскай  Федэрацыі.    Творчая,  натхнёная праца  настаўніка,  захапляльная  дапамога  у  пошукавай рабоце  з боку шматлікіх  вучняў-аматараў, настаўнікаў-паплечнікаў,  усебаковая  дапамога дырэктара  школы  В. П. Жыгалава  - усё  гэта дало  магчымасць  сабраць  шырокі  навуковы,  гістарычны  і цікавы  жыццёвы  матэрыял  для стварэння  школьнага  літаратурнага музея.   

      А.С.Пушкін,  як  адна  з  самых  дзіўных  з'яў  у  сусветнай  паэзіі  і пясняр  брацкага  рускага  народа,  заўсёды  быў  блізкі  беларусам.  Пад  яго  дабратворным  уплывам  расла  і  развівалася  беларуская  паэзія.

       Першая  сустрэча  А.С.Пушкіна  з  Беларуссю  адбылася  ў  маі  1820  года,  калі  ён  ехаў  у  паўднёвую  ссылку  з  Царскага  Сяла  па  Беларускім  тракце.  Яго  маршрут  праходзіў  праз  Полацк,  Віцебск,  Бабінавічы,  Оршу,  Магілёў,  Чачэрск,  Беліцу.  Праз  наш  край  пралёг  шлях  маладога  паэта  і  тады,  калі  ён  вяртаўся  з  выгнання  праз  Магілёў  і  Віцебск.  Сюжэт  аповесці  «Дуброўскі»  быу  падказаны  гісторыяй  небагатага  беларускага  шляхціча  па  прозвішчу  Астроўскі.   У  Беларусі  жылі  нашчадкі  паэта.

        У 12   раздзелах  школьнага  музея   налічваецца  больш  за 600  экспанатаў  асноўнага  і  дапаможнага  фондаў,  якія  адлюстроўваюць  розныя  бакі  жыцця   і  літаратурнай  творчасці Аляксандра Сяргеевіча  Пушкіна.  Агульная  экспазіцыйная  плошча  -  35 квадратных  метраў. Так у экспазіцыях «Петровское», «Друзья», «Михайловское», «Декабристы»,  «Семья»  шырока  прадстаўлены  дакументы,  архіўныя  матэрыялы  пра  жыццё  і   творчасць  паэта,  ксеракопіі  асобных  яго  твораў.  У  раздзеле  «Потомки  Пушкина  на  Беларуси»  праслежваецца  жыццёвы шлях дачкі Аляксандра  Сяргеевіча  Наталлі Аляксандраўны, а ў раздзеле  «Пушкин  сдружил  нас»  размешчаны  перапіска  вучняў  школы  з  праўнукам паэта  С. С. Кліменкам,  яго  асабістыя  рэчы – салдацкі  рэчавы  мяшок,  запісы  яго  расказаў,  фатаграфіі  і  іншыя  экспанаты. Адзін  з  раздзелаў  прысвечаны  пушкінскаму  музею-запаведніку  Міхайлаўскае  і  яго  дырэктару  Герою  Сацыялістычнай  Працы, заслужанаму  работніку  культуры  РСФСР  С. С. Гейчанку.  Тут  экспануюцца  копіі  дакументаў,  кнігі С.С.Гейчанкі  «У  Лукоморья»,  «Пушкиногорье», фотаздымкі,  перапіска  былога  дырэктара музея-запаведніка   з  экскурсаводамі школьнага  музея.   Раздзел «Пушкин  и  Великая  Отечественная  война»  змяшчае  ўспаміны  былых  воінаў  Чырвонай  Арміі,  што  ўдзельнічалі  ў  размініраванні  магілы  А.С.Пушкіна,  мноства  фатаграфій  і  замалёвак  гістарычных  мясцін  таго  часу, пісьмо і падарунак  на  ўспамін  (франтавы  компас, выпуск 1941г.) сапёра  Д. М. Байчорава.  Музей  мае  матэрыялы  пра  самалёт  «А.С.Пушкін»,  пабудаваны  на  сродкі  пісьменніка  І.А.Новікава – ганарар  за  кнігу  «Пушкін  на поўдні»,  пра  яго  экіпаж.

  У   экспазіцыі  і  фондах -  матэрыялы  краязнаўчых  знаходак  вучняў,  перапіска,  падарункі  сяброў  школьнага  літаратурнага музея, фатаграфіі,  альбомы, лепшыя  сачыненні, вырабы  па  дрэву  і  малюнкі  школьнікаў. 

    Самы  “старэйшы”  экспанат  -  кніга   « Полное  собрание  сочинений  А.С.Пушкина. Съ биографіей  А.С.Пушкина. С  портретами  и  многими  иллюстрациями  академика А. Лебедева…»  (Типография  Товарищества  И. Д. Сытина,  Валовая  улица, свой домъ.  Москва. – 1899 г.). Вялікую цікавасць вызываюць іншыя экспанаты: франтавы компас 1941 года, фотаздымак самалёта “А.С.Пушкін”, шматлікія пісьмы кіраўніку музея і юным пушкіністам.

У  бібліятэцы музея  ёсць  усе  творы  А.С.Пушкіна,  яго  раман  “ Яўгеній  Анегін”,  паэмы  “Палтава”,  “Медны  коннік” і іншыя,  перакладзеныя  на  беларускую  мову, прадстаўлена  літаратура  пра  жыццё  і  творчасць  вялікага  паэта,  кнігі  многіх  савецкіх  аўтараў  з  дарчымі  надпісамі.

 Літаратурны  музей – цэнтр вучэбна-выхаваўчай работы  школы, звязанай з вывучэннем жыцця  і  творчага  шляху  вялікага  русскага  паэта.

 Дзякуючы плённай  працы  кіраўнікоў музея: Вітаноўскай Святланы Васільеўны,  Закіравай Лідзіі Іванаўны, Бягеза Наталлі Анатольеўны, настаўнікаў  русскай  мовы  і  літаратуры, - многія вучні прайшлі і праходзяць цяпер  сапраўдную школу экскурсаводаў.  На  базе  музея працаваў  гурток “У Лукамор’я”, сёння - "Юны экскурсавод"; праходзяць   урокі  по  творчасці А.С.Пушкіна, Пушкінскія  тыдні   і  Дні  памяці паэта,   конкурсы літаратурных  чытанняў і  інсцэніраваннне ўрыўкаў з  твораў аўтара,  святы  паэзіі і выстаўкі творчых работ вучняў і г.д.                                                                    

   За  гады  існавання  літаратурнага  музея  у  ім  пабывала   больш 6 тысяч  наведвальнікаў.  Геаграфічная  карта іх пражывання ,  як  “распявядае”  Кніга  водгукаў,   шырокая і  цікавая.